လင်္ကာမြေမှာတစ်နှစ်တာ အပိုင်း(၁၈)၊ ဒမ္ဘူလကျောက်လိုဏ်ဂူကျောင်းတော်
ဒမ္ဘူလမြို့ ရွှေဘုရားကျောင်း ကားကလေးသည် တရိပ်ရိပ်ပြေးလွှားနေ၏။ စိမ်းလန်းသည့် လယ်ကွင်းများကိုလည်းဖြတ်ကျော်ခဲ့၏။ တောတောင်များ၊ မြို့ရွာများကိုလည်း ဖြတ်ကျော်ခဲ့၏။ (၄)ညအိပ်၊ (၅)ရက် ဘုရားဖူးခရီးအတွက် သီရိလင်္ကာရူပီး (၃၅၀၀၀) ဖြင့် ငှါးယူလာခဲ့သော ကားကလေးသည် မြန်မာရဟန်းတော်(၈)ပါးကို တင်ဆောင်ကာ သီရိလင်္ကာအဝှန်းသို့ ပြေးလွှားနေလေသည်။
မှန်ပါ၏။ စာသင်ကာလ (၂)လ ပြည့်ခါနီး၊( First Term ကုန်ခါနီး)တွင် ဘုရားဖူးခရီးထွက်ရန် အကြောင်းဖန်လာ၏။ ပုံမှန်အားဖြင့်ဆိုလျှင် သီရိလင်္ကာရောက် မြန်မာရဟန်းတော်များအနေဖြင့် First Term အကုန် ကျောင်းပိတ်ရက်အတွင်း (သို့မဟုတ်) အတန်းတင်စာမေးပွဲကြီးအပြီးတွင် နီးရာနီးရာ ရဟန်းတော်များစုပေါင်း၍ ဘုရားဖူးထွက်လေ့ရှိကြပါသည်။ ထိုသို့ဘုရားဖူးထွက်ခြင်းဖြင့် ဗုဒ္ဓါနုဿတိကုသိုလ်ရနိုင်ကြသည်သာမက တက္ကသိုလ်၌ပြဋ္ဌာန်းထားသော Architecture ဘာသာရပ်အတွက်လည်း အထောက်အကူများစွာရနိုင်ကြလေသည်။ စာရေးသူတို့အဖွဲ့ကား စင်္ကာပူနိုင်ငံမှတစ်ဆင့် ဘုရားဖူးကြွရောက်လာကြသော ဆရာတော်နှစ်ပါးကို အကြောင်းပြု၍ ပုံမှန်ထက် ရက်အတန်ငယ်စောကာ ဘုရားဖူးထွက်လာကြခြင်းဖြစ်လေသည်။
၂၀၁၀ခုနှစ်၊ မတ်လ (၁၀)ရက်နေ့တွင် ရန်ကုန်မြို့၊ တောင်ဥက္ကလာပမြို့နယ်၊ အမှတ်(၁)ဝိုင်း၊ သီရိသောမာရုံကျောင်းဆရာတော် ဘဒ္ဒန္တသောမာစာရ၊ ရွှေပေါက္ကံမြို့သစ်၊ (၂၁)ရပ်ကွက်၊ ပုဂံလမ်း၊ ပစ္ဆိမာရုံကျောင်း တိုက်အုပ်ဆရာတော် ဘဒ္ဒန္တကုဏ္ဍလတို့နှစ်ပါး စင်္ကာပူ၊ ဇယမင်္ဂလာကျောင်းဆရာတော်၏ တိုက်တွန်းစီမံပေးမှုဖြင့် သီရိလင်္ကာသို့ဘုရားဖူးရောက်လာကြ၏။
မကုဋာရာမကျောင်း၏ ထုံးစံအတိုင်း နာယကဆရာတော်များ၏ စီမံပေးမှုဖြင့် ဧည့်သံဃာတော်များ သီတင်းသုံးရန် သီးသန့်ထားရှိသောအခန်းတွင် သီတင်းသုံးစေပြီးလျှင် ဘုရားဖူးထွက်ရန်ကားငှါးခြင်း၊ လိုအပ်သည်များကိုဝယ်ယူစုဆောင်းခြင်းများကို ဆောင်ရွက်ကြရလေသည်။ ထိုကိစ္စအဝဝကို သမိုင်းသုတေသီဆရာတော် ဦးဣန္ဒာစာရက ဦးဆောင်စီမံပါသည်။
မတ်လ (၁၂)ရက်နေ့တွင် ဧည့်သည်ဆရာတော်နှစ်ပါး၊ ဆရာတော်ဦးဓမ္မဝံသ၊ ဦးဣန္ဒာစာရ၊ ဦးပညိန္ဒြိယ၊ ဦးသုမန၊ ဦးဝဏ္ဏသာမိ နှင့်စာရေးသူတို့အဖွဲ့သည်
တမ္ဘူလမြို့၏ နာမည်ကျော် Golden Rock Temple (ရွှေကျောက်ကြီးကျောင်းတော်)သို့ စတင်ရောက်ရှိကြ လေသည်။ တောင်ခြေရင်းရှိ Golden Buddha (ရွှေဘုရားကြီး) အဆောင်တော်အတွင်းသို့ ဝင်ရောက်ဖူး မျှော်ကြပြီး တောင်ပေါ်သို့ဆက်တက်ကြပါသည်။
တောင်ပေါ်သို့တက်ရာ ကျောက်သားလမ်းကလေးသည် တက်ဆင်းသွားလာနေကြသည့် ဘုရားဖူးများဖြင့်စည်ကားနေပေသည်။ လမ်းဘေးတစ်လျှောက်တွင် ကြာပန်းရောင်းသူများ၊ ဒေသထွက် ကျောက်ရောင်စုံများကိုရောင်းချနေကြသူများ၊ ဒမ္ဘူလတောင်အမှတ်တရပစ္စည်းများကို ရောင်းချနေသူများဖြင့် စည်စည်ကားကားရှိလှပါသည်။
ကုလားမကလေးတစ်ဦးက “Sadu, take a photo”ဟု ပြုံးပြုံးရွှင်ရွှင်ပြောလာသဖြင့် ဓာတ်ပုံရိုက် ယူခဲ့ရပါသေးသည်။ “နာမမုခသယ်=နာမည်ဘယ်လိုခေါ်သလဲ” ဟု တစ်ခွန်းတည်းသာ တတ်ထားသော ဆင်ဟာလိဘာသာစကားဖြင့် မေးလိုက်သောအခါ သွားတက်ကလေးပေါ်အောင်ပြုံးပြရင်း သုန္ဒရီ (Sundari) ဟုပြန်ဖြေလေသည် ။ သူငယ်ချင်းတစ်ပါးက “သုန္ဒရီကလည်း အသားမဲလိုက်တာကွာ၊ သီရိလင်္ကာရောက်ကတည်းက အသားဖြူတဲ့ လင်္ကာသူရယ်လို့ တွေ့ကိုမတွေ့မိဘူး၊ ရာမလက္ခဏဇာတ်မှာပါတဲ့ သီတာဒေဝီ ချောတယ်ဆိုတာ ဘယ်လိုလုပ်ပြီးယုံရမလဲမသိဘူး” ဟုပြောသဖြင့် ပြုံးရယ်ကာ ခေါင်းညိတ်ကြရလေသည်။
နာမည်ကျော် ဒမ္ဘူလကျောက်လိုဏ်ဂူကျောင်းတော် တောင်ထိပ်သို့ရောက်သောအခါ မောလာခဲ့သမျှ အံ့သြကြရပါတော့၏။ အာဂဗုဒ္ဓဘာသာများပါပေ။ ဧရာမကျောက်တုံးကြီးကို ဧရာမဂူခေါင်းကြီးများဖြစ်အောင်ဖန်တီးပြီး တောမှီရဟန်းတော်များအတွက် ကျောင်းသင်္ခမ်းဖြစ်အောင် လှူဒါန်းခဲ့ကြသည်ကို ရင်သပ်ရှုမောဖွယ်ရာ တွေ့မြင်ရလေသည်။ သမိုင်းသုတေသီ အရှင်ဣန္ဒာစာရက “ဤကျောင်းသည် ဝဋ္ဋဂါမဏိမင်းကြီး (1st century BC) ၏ ကောင်းမှုတော်ဖြစ်ကြောင်း၊ စစ်ဘေးစစ်ဒဏ်မှ ပုန်းရှောင်ရန်အတွက် သူကိုယ်တိုင်ရသေ့ရဟန်းအသွင်ဖြင့် ဤလိုဏ်ဂူ၌နေထိုင်ခဲ့ဖူးကြောင်း၊ စစ်နိုင်၍ မင်းပြန်ဖြစ်သောအခါ လိုဏ်ဂူကိုရှေးကထက်ပိုမိုကြီးမားအောင် ထွင်းထုပြုပြင်၍ သံဃာတော်များကိုလှူဒါန်းကြောင်း နိဒါန်းချီပြီး ရှည်လျားစွာရှင်းပြလေသည်။
လိုဏ်ဂူတစ်ခုလုံးသည် ကျောက်သားအတိဖြင့်ပြီး၏။ ကျောက်တစ်လုံးတည်းကို အခန်းပေါင်း မြောက်များစွာဖြစ်အောင် ထွင်းထုထားခြင်းဖြစ်၏။ တစ်ရာထက်မနည်းသော ဗုဒ္ဓရုပ်ပွါးတော်များကို ရပ်တော်မူ၊ လျောင်းတော်မူ၊ ထိုင်တော်မူ စသည့်ပုံစံမျိုးစံဖြင့် ဖူးတွေ့ကြရလေသည်။ နံရံများ မျက်နှာကြက်များတွင်လည်း လှပသေသပ်သော ပန်ချီဆေးရေးများဖြင့် ခြယ်မှုန်းပူဇော်ထားကြသည်ကို ဝမ်းမြောက်ကြည်နူးစွာ တွေ့မြင်ကြရလေသည်။ စာရေးသူတို့ မြန်မာပြည်၊ ကျောက်ဖြူမြို့မှ ကျောက်တစ်လုံးဘုရားကဲ့သို့ပင် ဖြစ်သည်ဟု အနီးစပ်ဆုံးဆိုနိုင်ပါသည်။
“တောင်ထိပ်မှာပဲဖြစ်ဖြစ် တောင်အောက်မှာပဲဖြစ်ဖြစ် ရေချိ်ုရှိရင် ကြာပေါက်နိုင်ပါတယ်”
(ဒမ္ဘူလတောင်ထိပ်မှ ကြာကန်ငယ်)
သီရိလင်္ကာတစ်ဝှန်းလုံးတွင် ဤသို့သော လိုဏ်ဂူပေါင်း တစ်ထောင့်နှစ်ရာကျော်ရှိကြောင်း သိရပါသည်။ အချို့သော သမိုင်းသုတေသီတို့က သီရိလင်္ကာနိုင်ငံသို့ ဗုဒ္ဓသာသနာတော်စတင်ရောက်ရှိခါစအချိန်က ဤသို့သော လိုဏ်ဂူများသည် ရဟန်းတော်များ သီးတင်းသုံးရာ ပင်မကျောင်းများဖြစ်ခဲ့ကြလိမ့်မည်ဟု ယုံကြည်ယူဆကြ၏။ တောနေရဟန်းသာမဏေများအနေဖြင့် ဤသို့သော ကျောက်လိုဏ်ဂူများကို တရားအားထုတ်ရာနေရာ (Meditation Place) အဖြစ်ရွေးချယ်ခဲ့ကြသည်ဆို၏။
တကယ်စင်စစ်တွင်လည်း ကျောက်လိုဏ်ဂူများသည် ဗုဒ္ဓသာသနာတော်သမိုင်း၌ များစွာအရေးပါလှပါ၏။ ဣန္ဒသာလလိုဏ်ဂူ၊ နန္ဒမူလိုဏ်ဂူ၊ သတ္တပါဏိလိုဏ်ဂူ စသည်တို့သည် ထင်ရှား၏။ ဣန္ဒသာလလိုဏ်ဂူတွင် ဘုရားသခင်သည် နတ်တို့သနင်း သိကြားမင်းကို သက္ကပဉှသုတ္တန်ကို ဟောတော်မူခဲ့၏။ နန္ဒမူလိုဏ်ဂူသည် ပစ္စေကဗုဒ္ဓာအရှင်မြတ်တို့ သီတင်းသုံးရာနေရာဖြစ်၏။ သတ္တပါဏိလိုဏ်ဂူသည် ပထမသင်္ဂါယနာတင်ရာ လိုဏ်ဂူဖြစ်ခဲ့၏။
သီရိလင်္ကာနိုင်ငံရှိအချို့သော ကျောက်လိုဏ်ဂူများတွင် “အာဂတာနာဂတ စတုဒိသာ သံဃဿ ဒေမ”စသည်ဖြင့် ရေးထိုးထားကြသည်ဆိုပါ၏။ ဆိုလိုသည်မှာ ဒကာဒကာမများက ကျောက်လိုဏ်ဂူများကို ရဟန်းတော်များ သီတင်းသုံးနိုင်လောက်သည်အထိ ဖန်တီးပြုပြင်ကြပြီး အရပ်ရပ်ကရောက်လာသည့် မည်သည့်ရဟန်းတော်မဆို သီတင်းသုံးနိုင်ပါကြောင်း ကျောက်စာရေးထိုးလှူဒါန်းထားခဲ့ကြခြင်း ဖြစ်လေသည်။
သီရိလင်္ကာရှိ ကျောက်လိုဏ်ဂူများကို သူတို့၏ပုံသဏ္ဍာန်ကိုလိုက်၍ အမည်နာမတပ်ကာမှည့်ခေါ် ကြသည်မျိုးလည်းရှိလေသည်။ ဥပမာအားဖြင့် သီဟမုခ (ခြင်္သေ့ပါးစပ်)ဂူ၊ ဟတ္ထိကုစ္ဆိ (ဆင်ကျောကုန်း)ဂူ စသည်တို့ဖြစ်လေသည်။ အစောပိုင်းကာလက လူသူမနီး တောကြီးမျက်မည်းထဲမှ တောနေရဟန်း သာမဏေများ တရားအားထုတ်ခဲ့ရာ အချို့သော ကျောက်လိုဏ်ဂူများသည် ယခုအခါ၌ကား ရှေးဟောင်း ကျောက်လိုဏ်ဂူပြတိုက်များအဖြစ်သို့ရောက်ရှိပြောင်းလဲလာခဲ့ရလေသည်။
မည်သို့ဆိုစေ… Cave Monastery ခေါ် ကျောက်လိုဏ်ဂူများသည် ဗုဒ္ဓသာသနာတော်အတွက် အဖိုးမဖြတ် နိုင်သောနေရာများအဖြစ် ယနေ့တိုင်ဆက်လက်ရပ်တည်လျက်ရှိနေကြလေသည်။ ဤလိုဏ်ဂူကြီး အတွင်း၌ တရားဓမ္မဖြင့် မွေ့လျော်တော်မူနေခဲ့ကြမည့် အရှင်မြတ်ကြီးများ၏ သီလ သမာဓိ ပညာမွှေးရနံ့ တို့သည်လည်း လိုဏ်ဂူများအနှံ့ သင်းပျံ့မွှေးကြိုင်လျက်ရှိနေဆဲဖြစ်ပါသတည်း။
အပိုင်း (၁၉) ကို ဆက်ရေးပါမည်။
အရှင်ဝိသာရဒ (ရမ္မာဝတီ)
0 comments:
Post a Comment