*အဆွေခင်ပွန်းကောင်းတို့၏သဘော*
Tuesday, January 04, 2011 
တောသားလေး
ရောင်ရဲခြင်းသည် စိတ်ကိုချမ်းသာစေပြီး လိုချင်လောဘကြီးခြင်းသည် စိတ်ကိုပူလောင်စေပါသည်။ ငါးရာငါးဆယ် ဇာတ်တော်ထဲတွင် ပါဝင်သော အဆွေခင်ပွန်းကို ဘယ်လိုအခြေအနေဘဲ ရှိနေပါစေ စွန့်ခွာမသွားဘဲ ရောင်ရဲစွာနေတတ်သည့် ကျေးမင်းအကြောင်းကို ဖော်ပြလိုက်ပါသည်။
ဟိမ၀န္တာမှ ဂင်္ဂါကမ်းခြေတွင် ရေသဖန်းပင်ကြီး တစ်ပင်ရှိသည်။ ဘုရားလောင်း ကျေးမင်းသည် ရာပေါင်းများစွာသော ကျေးတို့ဖြင့် ထိုရေသန်းပင်၌ နေပါသည်။ ရက်လ ကြာလာသောအခါ သဖန်းသီးများကုန်၍ အညွန့်၊ အရွက်၊ အခွံနှင့် အပွေးတို့သည်သာ ကျန်တော့ပါသည်။ ထိုအခါ အခြားသော ကျေးများ ရေသဖန်းပင်မှ ထွက်ခွာသွားကြသော်လည်း ကျေးမင်းကား စွန့်ခွာသွားခြင်းမပြုဘဲ အညွန့်စသည်တို့ကို စား၍ ဂင်္ဂါရေကိုသာ သောက်ပြီး ရောင့်ရဲစွာနေ၏။
သိကြားမင်းသည် ကျေးမင်းကို စမ်းသပ်လို၍ မိမိ၏ အာနုဘော်ဖြင့် သဖန်းပင်ကို ခြောက်သွားအောင် ပြုလိုက်ပြီး အပေါက်အကြီးအငယ်များ ဖြစ်စေ၍ ထိုနေရာများမှ သစ်ဆွေးမှုန့်များကို ယိုထွက်စေပါသည်။ သို့သော်လည်း ကျေးမင်းသည် ခွာမသွား၊ သစ်ဆွေးမှုန့်များကို စား၍ ဂင်္ဂါရေဖြင့် ရောင့်ရဲနေသည်။
ထိုအခါ သိကြားမင်းသည် သုဇာတာ မိဖုရားနှင့်အတူ ဟင်္သာမင်းအသွင် ဖန်းဆင်း၍ ကျေးမင်းရှိရာသို့ လာခဲ့ပြီး အသီးမရှိတော့သော ဤသစ်ပင်ကို စွန့်ခွာသွားရန် တိုက်တွန်းစကားဆိုရာ ကျေးမင်းက “သူတော်ကောင်းတို့ မည်သည် အဆွေခင်ပွန်း၌ စည်းစိမ်ဥစ္စာ ကုန်သည်ဖြစ်စေ၊ မကုန်သည်ဖြစ်စေ၊ စွန့်ခွာသွားရိုးမရှိပါ၊ ရေသဖန်းပင်သည် ငါ၏ ဆွေမျိုးလည်းဟုတ်၊ မိတ်ဆွေလည်း ဟုတ်ပါသည်။ ထို့ကြောင့် အသီးများ မရှိသော်လည်း ကျွန်ုပ်စွန့်ခွာ မသွားနိုင်ပါ” ဟု ပြန်ကြားလိုက်သည်။
သိကြားမင်းသည် ကျေးမင်း၏ သဘောထားကို နှစ်ခြိုက်သွားသဖြင့် ဂင်္ဂါရေဖြင့် သဖန်းငုတ်တိုကို သွန်းလောင်းလိုက်ရာ ရုတ်ခြည်းပင် အခက်အရွက် အညွန့် အသီးတို့နှင့် ပြည့်စုံသော ရေသဖန်ပင်ကြီးတစ်ပင် ပြန်ဖြစ်သွားခဲ့သည်။
ဤဇာတ်တော်မှ ကျွန်တော်တို့အတွက် ဘယ်အရာကိုမဆို လိုချင်လောဘနည်းပြီး ရောင်ရဲတတ်ခြင်းသည် အကောင်းဆုံးဖြစ်ကြောင်း၊ ကိုယ့်ရဲ့ အဆွေခင်ပွန်းကိုလည်း ဘယ်အခြေအနေ ရောက်နေပါစေ စွန့်ခွာမသွားသင့်ကြောင်း၊ နှိမ့်ချ ခွဲခြားဆက်ဆံဖို့ မသင့်ကြောင်း သင်ခန်းစာ ယူစရာများကို မှတ်သားရပါသည်။ ပုထုဇဉ်တွေ၏ သဘောသဘာဝအရ မချမ်းသာသေးသောသူက ချမ်းသာလိုချင်တယ်၊ ချမ်းသာတဲ့သူက ပိုပြီး ချမ်းသာ ချင်ကြတယ်၊ ဘယ်လောက်ဘဲ ပြည့်စုံနေပါစေ အမြဲတမ်းလိုအပ် နေတတ်ကြတယ်။ အဲဒီစိတ်တွေရှိနေသမျှ ကာလပတ်လုံး စိတ်တွေဟာ ပူလောင်နေပြီး ကိုယ့်အတွက်ရော အများအတွက်ပါ အကျိုးယုတ်စေပါတယ်။ ဒါကြောင့် ရှိသမျှနဲ့ ရောင်ရဲတင်းတိမ် တတ်သည့် စိတ်များကို မွေးမြူနိုင်ကြရန် ကြိုးစားကြပါလို့ ပြောရင်း နိဂုံးချုပ်လိုက်ပါသည်။
အားလုံးသော ဓမ္မမိတ်ဆွေများ ကိုယ်စိတ်နှစ်ဖြာ ကျန်းမာချမ်းသာကြပါစေ။
တောသားလေး
0 comments:
Post a Comment