ဂျန်းတဲလ်မန်း -အတွေး
ဥရောပ ယဉ်ကျေးမှုထဲတွင် အတော်နှစ်သက်မိသော စိတ်နေသဘောထားနှင့် ကျင့်ဝတ်စံ(moral value) ဖြစ်သည်။ တစ်ခုရှိတာက တွေးမိတာ ကြာပြီဖြစ်သော်လည်း ဂျန်းတဲလ်မန်း အယူအဆကို ပြောကြရင် ရှေးရိုးသိပ်စွဲသည်ဟု စွပ်စွဲခံရမလား စိတ်ထင့်နေသည်။ သို့သော် ဘောင်းဘီတိုနှင့် မိဘမဲ့ကလေးဖြစ်သော ၁၃ နှစ်ကောင်လေး တစ်ယောက်မှာတောင် လူကြီးလူကောင်းဆန်သည့် အပြုအမူ စိတ်နေစိတ်ထား တွေ့ရသည်မှစ၍ စိတ်ထင့်တာပျောက်သွားပြီး ဟိုကြည့်သည်ကြည့် လျှောက်ကြည့်တော့သည်။ မျှော်လင့်မိသော လူများတွင် တွေ့ရသည်ကများပါသည်။ တချို့က အပေါ်ယံ ယဉ်ကျေးမှုဝတ္တရား လုံးလုံးကျေပွန်ပြီး အရေးအကြောင်းမှာ ကျိုးကြောင်းမညီညွတ်စွာ တကိုယ်ကောင်းတာ (irrationally selfish)၊ ရိုးဖြောင့်မှုမရှိတာ တွေ့ရသည်။ (ထိုသို့တွေ့လိုက်ရသော်လည်း ထိုပုဂ္ဂိုလ်များနှင့် ပတ်သက်၍ စိတ်ထဲတစ်စုံတစ်ရာ ပြောင်းလဲမှုမရှိပါ။ သဘာဝဟုသာ မှတ်ယူပါသည်။)
အဆိုပါ ကိုယ်ရည်ကိုယ်သွေးသည် အသက်ကြီးသည် ငယ်သည်နှင့်မဆိုင်၊ ပျော်ပျော်နေတတ်တာ လေးလေးနက်နက်နေတတ်တာနှင့် မဆိုင်။ ဘာနှင့်ဆိုင်သလဲတော့ ကျွန်တော်လည်း သေသေချာချာမသိ။ စာရှုသူများတော့ သိကြလိမ့်မည် ထင်၏။
"ခင်ဗျားဟာ ရိုးသားဖြောင့်မတ်သူမဟုတ်ဘူး၊ ခင်ဗျားဟာ လူကြီးလူကောင်း မဟုတ်ဘူး " လို့ အပြောခံရလျှင် သေလောက်အောင်နာသော လူ့အဖွဲ့အစည်းကြီးတစ်ခု တချိန်ချိန်မှာ မဖြစ်ပေါ်လာဘူးဟု မည်သူအတပ်ပြောနိုင်မည်နည်း။ ဤ၀ါကျသည် (သိပ္ပံမောင်ဝ၏ ဆရာစောကျောင်းအကြောင်းရေးသော) ရွာ့ကျက်သရေဆောင်းပါးကို တုပပြောဆိုလိုက်တာ ဖြစ်ကြောင်း ရိပ်စားမိကြပါလိမ့်မည်။ သိပ္ပံမောင်ဝက အဆိုပါဆောင်းပါးကို သရော်သွားနှင့်ရေးထားသော်လည်း နောက်ဆုံးဝါကျကိုတော့ လေးလေးနက်နက် မျှော်လင့်ရေးသားခြင်း ဖြစ်သည်ဟု ယုံကြည်ပါသည်။ (မှတ်ဥာဏ်ကို တူးဆွလိုလျှင် ဤ၀ါကျကို ဖတ်ကြပါကုန်။ "ဤသို့ မှတ်ချက်ချသော မောင်လူအေးမှာ မိမိငယ်စဉ်က ဤကျောင်းမျိုးမှာပင် ပညာသင်ကြား ပြီးနောက် တစတစ တိုးတက်ကာ ယခုအခြေအနေသို့ ရောက်နေသည်ကို အမှတ်ရဟန် မတူ။ နောင်နှစ်ပေါင်း လေးဆယ် ငါးဆယ်ခန့်ကြာလျှင် ဤရွာကျောင်းမှပင် မြန်မာပြည် သမ္မတ ထွက်ချင် ထွက်နေမည်ကိုလည်း စဉ်းစားမိပုံမပေါ်။")ကျွန်တော်လည်း ရိုးဖြောင့်သော မျှော်လင့်ချက်နှင့် လေးနက်စွာရေးမိခြင်းပါ။ လောလောဆယ်ရသော အကျိုးကတော့ ဆရာစောကျောင်းနှင့် ပိန်မသာ လိန်မသာများမှ ထွက်သော ကျွန်တော့်ငယ်သူငယ်ချင်း တအူတုံဆင်းများကလည်း လက်ခုပ်လက်ဝါး တီးတာခံရပါသည်။ သြဘာသံများကို ရလိုက်ပါသည်ဟု ဆိုလို၏။
ဤတွင် ဂျန်းတဲလ်မန်းအတွေး ပြီးဆုံးပါ၏။
ကြားထဲသတိရလာတဲ့ ဗုဒ္ဓဘာသာဆိုင်ရာ ဆောင်ပုဒ်လေးတစ်ခုပေါ်လာ၍ မမေ့ခင် ချရေးလိုက်ပါသည်။ ဤဆောင်ပုဒ်ကို ဥာဏ်ရှိသလို သုံး၍ ဂျန်းတဲလ်မန်းတွေအများကြီး ဖြစ်လာဦးမည်လား မပြောတတ်။ (ဝေါဟာရမကြွယ်ဝလို့ ဂျန်းတဲလ်မန်း ဆိုတာသုံးရပေမယ့် အမျိုးသမီးများလည်း အပါအ၀င်ဖြစ်တာ ထင်ရှားပါသည်။ (လူချင်းအတူတူ လူ=manဟုသာ) အဓိပ္ပါယ်သက်ရောက်သည်ဟု ယူဆရ/ သင့်/ပေးသင့်ပါသည်။)
"ပြောပြုတွေးလျှင် သတိယှဉ် ဆင်ခြင်ဥာဏ်ရှေ့သွား"
0 comments:
Post a Comment